Hera, Erpur og Haffi Haff saman í Gay Pride-laginu

„Erpur er ljúfari en lamb. Það á nú yfirleitt við um svona pörupilta. Þeir eru alltaf mjög ljúfir í samstarfi," segir söngkonan Hera Björk Þórhallsdóttir um samstarfið við rapparann Erp Eyvindarson.

Hera, Erpur og Haffi Haff leiða saman hesta sína í Gay Pride-laginu í ár sem nefnist Finnum ástina. Hinsegin dagar fara fram í Reykjavík dagana 4. til 7. ágúst. Hera og Erpur sömdu lagið ásamt Örlygi Smára, Pétri Erni og Valgeiri Magnússyni. Hera segir samstarfið hafa gengið mjög vel og verið afar skemmtilegt.

En fara þau vel saman í lagi, saklausa sveitastelpan og strigakjafturinn úr Kópavogi?

„Ég veit ekki með saklausu sveitastelpuna? En já, er þetta ekki þessi klassíski dúett?"

Og svo glyshomminn með?

„Já. kyndilberinn sjálfur. Þetta er hið besta mál. Við erum með samkynhneigð, gagnkynhneigð, rappara, brjálæðinga og dívur af öllum kynjum. Og úr öllum trúarfélögum," segir Hera og hlær. „Það er kannski kominn tími til að gagnkynhneigðir sýni samstöðu í verki og syngi Gay Pride-lagið. Við erum hópur mjög sterkra gagnkynhneigðra einstaklinga sem styðjum málstaðinn þeirra, bæði flytjendur og lagahöfundar. Þetta er samfélagið í dag, það er að breytast hægt en örugglega. Við erum að fatta það, að ást er ást, hvernig sem á hana er litið."

Hera er gríðarlega ánægð með lagið sem hún segir partívænt með grípandi viðlagi. „Boðskapurinn er ástin, rómantíkin og gleðin í loftinu," segir hún. „Ég er búin að vera að syngja lagið á ensku í Bandaríkjunum og Þýskalandi og í Hrísey. Það eru allir ánægðir með þetta og kunna lagið strax. Byrja að syngja strax í fyrsta viðlagi, sem er góðs viti."atlifannar@frettabladid.is