Í gömlum húsbíl með hundi

„Þetta verður „spontant“, ferskt og skemmtilegt,“ segir útvarpsmaðurinn Andri Freyr Viðarsson.

 

Hann stjórnar sínum fyrstu sjónvarpsþáttum í sumar, Andri á flandri, þar sem hann ferðast um landið á gömlum húsbíl. Eini ferðafélagi hans verður hundur sem er að sögn Andra „bara vinur“. „Það er gaman að komast aðeins frá stúdíóinu, ferðast um og kynnast landi og þjóð,“ segir hann.

 

Þættirnir verða sex talsins og hefja göngu sína í Sjónvarpinu um miðjan júlí eftir að Kastljós fer í sumarfrí. Þeir verða nokkuð svipaðir ferðaþáttum Andra Freys og Ómars Ragnarssonar sem voru á Rás 2 í fyrra og nutu mikilla vinsælda. „Núna þarf maður að gera þetta allt sjálfur. Ólíkt Ómari veit ég ekkert um þetta. Maður verður örugglega villtur úti í vegarkanti á bíl sem er nýbúinn að bræða úr sér og sprungið á honum. En þetta verður ævintýri,“ segir hann hress.

 

Ómar Ragnarsson stýrði á sínum tíma þáttunum Stiklum, þar sem hann ferðaðist um landið og hitti alls konar fólk, margt ansi skrýtið. „Þetta verða Stiklur yngri kynslóðar,“ segir Andri Freyr um nýju þættina. „Ég ætla bara að hitta áhugavert og skemmtilegt fólk. Það þarf ekkert endilega að vera skrýtið en það má alveg vera það.“ Andri gekkst nýverið undir aðgerð við brjósklosi, auk þess sem hann hætti að reykja fyrir þremur vikum. Hann er því hressari en nokkru sinni fyrr og til í slaginn í sumar. „Þetta er það auðveldasta sem ég hef gert,“ segir hann og skilur ekkert í fólki sem á erfitt með að hætta að reykja.

- fb