Kópavogsbær uppfyllir skyldur gagnvart blindum

Úrskurðarnefnd félagsþjónustu og húsnæðismála hefur kveðið upp þann úrskurð að sú ferðaþjónusta sem Kópavogsbær veitir lögblindum einstaklingum í bænum samræmist lögum um málefni fatlaðra.

 

Í tilkynningu frá bænum segir að Blindrafélagið hafi haldið því fram að bærinn veiti ekki þá ferðaþjónustu sem lög kveði á um en að bæjaryfirvöld hafi ávallt vísað því á bug og bent á að þjónustan væri jafnvel betri en lög geri ráð fyrir. „Nú hefur fyrrgreind úrskurðarnefnd staðfest að bærinn uppfyllir sínar lagalegu skyldur í þessum efnum.“

„Upphaf þessa máls má rekja til þess að stjórn Blindrafélagsins óskaði eftir viðræðum við bæjaryfirvöld um að bærinn tæki þátt í leigubílakostnaði lögblindra í bænum. Því erindi var hins vegar hafnað á þeim forsendum að með því væri verið að veita lögblindum ferðaþjónustu umfram annað fólk með fötlun,“ segir einnig.

 

Bæjaryfirvöld bentu jafnframt á að ferðaþjónusta fyrir fatlað fólk væri sértæk almenn þjónusta og að lögblindir gætu nýtt sér sérútbúna bíla ferðaþjónustunnar til að sækja vinnu, skóla eða hæfingu. „Í Kópavogi gætu þeir sem nýttu sér ferðaþjónustuna fengið allt að 68 ferðir á mánuði og að kvöldferðir mætti panta samdægurs.“

 

„Málið fór hins vegar fyrir úrskurðarnefnd félagsþjónustu og húsnæðismála eftir að bærinn synjaði kröfu sautján ára drengs um niðurgreidda leigubílaþjónustu. Hann taldi að bærinn bryti með því ákvæði laga um málefni fatlaðra en á það féllst nefndin ekki, eins og áður sagði. „Verður ekki á það fallist að sú þjónusta sem [Kópavogsbær] hefur boðið fram brjóti gegn fyrrgreindum reglum laganna," segir í úrskurðinum.“

Samkvæmt lögunum er markmið ferðaþjónustu fatlaðs fólks að gera þeim sem ekki geta nýtt sér almenningsfarartæki vegna fötlunar kleift að stunda atvinnu og nám og njóta tómstunda.