Sjarmerandi við sjóinn

Ingibjörg Klemensdóttir leirlistamaður rekur Gallerí Dungu í notalegu húsnæði við gömlu höfnina í Geirsgötu. Þar er hún bæði með vinnustofu og gallerí þar sem hún selur verk sín af margvíslegum toga.

„Ég byrjaði seint í skóla, orðin 36 ára, en útskrifaðist með BA-gráðu frá leirlistadeild Listháskóla Íslands árið 2000," segir Ingibjörg. Listaáhuginn hefur þó fylgt henni í langan tíma. „Ég sótti leirnámskeið hjá Steinunni Marteins, var í Myndlistaskóla Kópavogs og lærði teikningu og málun í mörg ár," upplýsir Ingibjörg, sem var því komin með allgóðan grunn þegar hún skellti sér loks í Listaháskólann.

Eftir útskrift var hún með vinnustofu heima. Í maí í fyrra var komið að þáttaskilum. Þá flutti hún verkstæði sitt niður á Geirsgötu þar sem hún er nú bæði með vinnustofu og gallerí undir nafninu Gallerí Dunga.

Ingibjörg vinnur mikið með postulín sem henni þykir mjúkt og yndislegt efni en einnig vinnur hún með gler. „Þá hef ég einnig verið að rakubrenna töluvert, en það geri ég í gasofni í skúr á Eyrarbakka," segir hún glaðlega.

Úrvalið í munum Ingibjargar er mikið, allt frá skúlptúrum af kvenlíkamanum til nytjahluta á borð við skálar og lampa. Ferðamenn eru tíðir gestir hjá Ingibjörgu og heillast þeir mest af landslagslínu hennar úr keramik. „Ég hef verið með þá línu lengi og túristarnir segja stundum að þeim finnist þeir vera komnir inn í íslenska náttúru." Í Gallerí Dungu eru þó ekki aðeins munir Ingibjargar heldur einnig munir og fatnaður eftir aðra hönnuði.

Ingibjörg segir góðan anda ríkja í gömlu verbúðunum við höfnina. „Tengslin við sjóin gerir hverfið svo sjarmerandi. Gömlu karlarnir sem voru með verbúðirnar hér áður eru með annan fótinn hérna hjá okkur, sem lífgar upp á tilveruna," segir hún og telur gott samstarf vera milli nágrannanna í grænu húsunum.

„Við erum öll samstíga um að byggja upp hverfið og gera það að sjarmerandi hverfi í jaðri borgarinnar enda minnir andinn hér svolítið á Nýhöfn í Kaupmannahöfn," segir Ingibjörg glaðlega.

solveig@frettabladid.is