Jóhannes Haukur: Ég tók alltaf Hotel California á Ara í Ögri

Jóhannes Haukur Jóhannesson, leikarinn góðkunni, er maðurinn á bak við eftirpartí Eagles-tónleikanna í kvöld. Hann er búinn að fá veitinga- og skemmtistaðinn Austur undir herlegheitin, þar sem Ásgeir Kolbeinsson ræður ríkjum.

„Það er búið að hafa samband við mig, ég get staðfest það," segir Ásgeir í samtali við Fréttablaðið. Ásgeir vildi að öðru leyti lítið tjá sig um eftirpartíið, honum hefði verið gert ljóst að vera ekki með neitt gutl á boðstólum heldur bjóða aðeins upp á það besta, Johnny Walker Blue Label viskí, flott kampavín og gott gin. Þá á grillið að vera opið ef menn skyldu vilja fá sér eitthvað að borða.

Þeir Jóhannes Haukur og Ásgeir hafa hist nokkrum sinnum í ræktinni að undanförnu og rætt málin en flestum ætti að vera kunnugt um það gríðarlega líkamsræktarátak sem Jóhannes lagði á sig fyrir leik sinn í kvikmyndinni Svartur á leik. Um líkamlegt atgervi Ásgeirs ætti ekki að þurfa hafa mörg orð, hann hefur verið fastagestur í World Class undanfarin ár.

Þótt Jóhannes sé eftirsóttur leikari hefur hann af og til aðstoðað góðvin sinn Ísleif B. Þórhallsson, skipuleggjanda Eagles-tónleikanna. Þeir kynntust þegar Ísleifur framleiddi Hellisbúann í Íslensku óperunni fyrir nokkrum árum. Jóhannes er titlaður „verkefnisstjóri" í störfum sínum hjá Senu. Í kvöld verður stóra stundin á þeim vettvangi þegar Eagles kemur fram í Laugardalshöllinni. „Þetta liggur mjög vel fyrir mér því ég er mjög skipulagður maður að eðlisfari," segir Jóhannes, sem hafði enn ekki fengið að hitta stjörnurnar Don Henley eða Glenn Frey. Hann hafði hins vegar hitt bassaleikarann Timmy Smith en átti von á því að hitta Frey og Henley á hljóðprufu í gærkvöldi. „Við verðum þarna að tína stilka af jarðarberjum og svona."

Þetta eru síður en svo fyrstu kynni Jóhannesar af Eagles, því áður en hann sló í gegn sem leikari var hann trúbador á kránni Ara í Ögri, þar sem Hotel California var yfirleitt á lagalista kvöldsins. Jóhannes er sem sagt grjótharður Eagles-aðdáandi. „Ég tók alltaf sólóið. Ég vona bara að ég fari ekki að tala um það við Don Henley eftir tónleikana, vel í glasi. Það væri mjög vandræðalegt."freyrgigja@frettabladid.is