Með endurkomu að hætti Travolta

Björn Jörundur Friðbjörnsson, oftast kenndur við hljómsveitina Nýdönsk, hefur verið ráðinn í lítið hlutverk í kvikmyndinni Svartur á leik. Björn mun leika smáglæpamanninn Skara Tattoo en upphaflega stóð til að Hilmir Snær færi með hlutverkið.

„Öll mín hlutverk í gegnum tíðina hafa komið þannig til að Hilmir hefur verið of upptekinn við að leika þau. Nema náttúrlega í Englunum, því þá lékum við saman," segir Björn á nokkuð kaldhæðinn hátt. Þetta verður fyrsta kvikmyndahlutverk Björns í níu ár, allt frá því að hann lék í Stellu í framboði sem var frumsýnd 2002.

Björn Jörundur hóf kvikmyndaferilinn reyndar á mjög eftirminnilegan hátt í Sódómu Reykjavík eftir Óskar Jónasson en eftir hana kom átta ára hlé. Árið 2000 fór Björn síðan á kostum í Englum alheimsins sem Viktor. Og næstu tvö árin lék Björn í næstum öllum íslensku kvikmyndunum sem framleiddar voru, fimm myndum alls, auk kvikmyndarinnar No Such Thing í leikstjórn Hal Hartley.

„Ég kláraði skammtinn minn og menn þurftu ekkert lengur að nota mig. Núna kem ég hins vegar aftur og þá er bara að standa sig."

Þórir Snær Sigurjónsson lýsti því í samtali við Fréttablaðið að þetta væri Travolta-endurkoma hjá Birni og vísaði þar í eftirminnilega endurkomu leikarans í Pulp Fiction. „Öllu má nú nafn gefa," segir Björn. „En þetta hljómar vel, var ekki Travolta ekki akkúrat í öllum kvikmyndum á einhverjum tímapunkti þar til menn fengu nóg?"

Leikhópurinn fyrir Svartan á leik er því að verða nokkuð skýr; Þorvaldur Davíð og Jóhannes Haukur leika stærstu hlutverkin en þau Egill Einarsson og María Birta verða í smærri hlutverkum auk Björns Jörundar. Björn segist ekki þurfa að massa sig upp fyrir sitt hlutverk eins og Jóhannes Haukur, enda séu tvær vikur líka eilítið skammur tími fyrir slíka yfirhalningu.

„Minn smákrimmi er líka alveg húðlatur og hefur ruglað sig jafnt og þétt í gegnum tíðina."

freyrgigja@frettabladid.is