Blogga um brjóst og sólgleraugu

„Það er fátt betra en brjóst og sólgleraugu. Þetta tvennt skiptir okkur miklu máli og vildum deila því með heiminum," segir Jón Atli Helgason, plötusnúður og hárgreiðslumaður um bloggið, www.titsintheshade.com.

Jón Atli og Christian d"Or, sólgleraugnasafnari og herramaður, sameina ást sína á sólgleraugum og brjóstum á blogginu sem vakið hefur mikla athygli.

„Það eru fá eðalblogg í gangi í heiminum í dag og við vildum sýna gott fordæmi með því að búa til þessa síðu," segir Jón Atli en þeir félagarnir taka flestar myndirnar sjálfir.

„Við erum líka með rússneskan ljósmyndara á okkar snærum og svo eru nokkrar myndir úr einkasafni. Stúlkur eru viljugar að láta mynda sig fyrir bloggið því þetta er ekkert klám heldur fágaðar myndir og vel skrifaðir textar."

Síðan hefur verið í stöðugri sókn frá því hún fór í loftið og strákarnir fá góðar viðtökur hjá lesendum. „Fólk er yfir sig hrifið og amma líka. Það er hafsjór af fallegum efnivið þarna úti þannig að við höldum ótrauðir áfram." segir Jón Atli, sem er búsettur í Kaupmannahöfn og ekkert á leiðinni heim. „Kaupmannahöfn líkar vel við mig og mér líður vel."

-áp