Courtney Love stal bíl og bílstjóra

Courtney Love gerði ljósmyndarann David LaChapelle brjálaðan fyrr í vikunni þegar hún stal bílnum hans, samkvæmt dagblaðinu New York Post.

Forsaga málsins er sú að Love og LaChapelle voru að skemmta sér saman á næturklúbbnum Soho House í New York þegar ljósmyndarinn veitti Love afnot af bíl sínum og einkabílstjóra til að fara heim til leikstjórans Brett Ratner. Hún átti að sækja hann og saman ætluðu þau á sýningu LaChapelle í New York.

LaChapelle ku hins vegar hafa sturlast þegar Love skilaði sér ekki og dvaldi heima hjá Ratner til morguns, á meðan einkabílstjórinn beið í bíl LaChapelle fyrir utan.

Samkvæmt heimildarmanni The New York Post var LaChapelle alveg brjálaður þegar hann var að reyna að ná í Love og bílstjóra sinn.

Aðspurð um málið var Love hin rólegasta. „Við áttum að fara á þessa sýningu og ég fór á bílnum hans,“ sagði hún. „En Brett [Ratner] vildi ekki fara fram úr rúminu þannig að við enduðum með að tala saman alla nóttina á meðan David [LaChapelle] beið í Soho House.“