Sigtryggur gerir sjónvarpsþátt

„Ég afþakkaði þessa beiðni fyrst ákaflega pent og langaði eiginlega ekkert að gera einhvern stúdíóþátt. En óskin kom frá FTT þar sem séra Frímann [Jakob Frímann Magnússon] ræður ríkjum og maður getur ekki svo auðveldlega sagt nei við hann. Þannig að lendingin varð sú að við gerðum þennan þátt í hljóðveri,“ segir Sigtryggur Baldursson, tónlistarmaður og verðandi sjónvarpsstjarna.

Á fimmtudaginn hefst nýr sjónvarpsþáttur í umsjón Sigtryggs á sjónvarpsstöðinni ÍNN. Honum hefur verið gefið nafnið Kolgeit og heitir því í höfuðið á hljóðveri Sigtryggs við Eyjaslóð. Svo skemmtilega vill til að umboðsaðili tannkremsins Colgate styrkir gerð þáttanna en það er önnur saga. Trymbillinn hyggst bjóða til sín valinkunnum tónlistarmönnum, taka lagið með þeim og spjalla við þá um heima og geima en Sigtryggi til halds og traust eru Flís-liðarnir Davíð Þór Jónsson og Helgi Svavar. Fyrstu gestir hans eru Megas og Senuþjófarnir en nýjasti diskur þeirra, (Hugboð um) vandræði, er nýkominn út. „Við fengum bara kamerumenn heim og það lukkaðist mjög vel.“

Sigtryggur segir að einungis verði um örfáa þætti að ræða en þegar Fréttablaðið bar að garði á Eyjaslóðinni var trommuleikarinn að æfa með Pétri Ben fyrir tónleika á Factory sem fram fara á föstudagskvöld.- fgg