Gibb ætlar ekki að svíkja Bó

„Maður hefur einhvern veginn lent í öllu og þetta fer alltaf á einhvern veginn og yfirleitt ekki á þann versta," segir Ísleifur B. Þórhallsson hjá Senu.

Breski söngvarinn Robin Gibb var fluttur með hraði á sjúkrahús á fimmtudagskvöld en hann er meðal jólagesta Björgvins Halldórssonar. Í ljós kom að Gibb var með ristilbólgu en samkvæmt breska blaðinu The Sun var söngvarinn ákaflega þjáður þegar sjúkrabíllinn kom aðvífandi að glæsilegu heimili hans í Oxford-skíri.

Gibb hætti við að taka upp fyrir BBC-þáttinn Songs of Praise vegna veikindanna en hann ætlar ekki að svíkja Bó. „Ég var að fá tölvupóst í hendurnar, hann er núna heima hjá sér að hvíla sig og þetta verður allt í lagi, hann ætlar að mæta," segir Ísleifur en forsala miða hefst á miðvikudag og almenn miðasala á fimmtudag. Söngvarinn sendi yfirlýsingu til breskra fjölmiðla sem sýnt höfðu veikindum hans mikinn áhuga og bað um næði fyrir sig og sína fjölskyldu. „Þetta er erfiður tími fyrir alla. En Gibb vill koma á framfæri þakklæti til allra vina sinna og aðdáenda sem hafa sent honum hlýjar kveðjur," segir í yfirlýsingunni sem The Sun birti.

Undirbúningur fyrir Jólagesti Björgvins er nú í fullum gangi og um helgina hefst leitin að sérstakri jólastjörnu sem mun verða þess heiðurs aðnjótandi að syngja á tónleikunum. Meðal þeirra sem sitja í dómnefndinni eru Björgvin sjálfur, Jóhanna Guðrún og Jóhannes Haukur.- fgg