Söluhæstu stjörnurnar

Tískutímaritin geta þakkað stjörnum á borð við Lady Gaga, Rihönnu og Kim Kardashian fyrir hærri sölutölur á þessu ári. Vefsíðan WWD hefur nú tekið saman þau andlit sem selja flest tímarit og sýnir rannsóknin fram á að ritstjórar ættu að setja einhverja af þessum þremur konum á forsíðuna til að ná sem hæstum sölutölum.

Sem dæmi má skoða marshefti bandaríska Vogue, sem er eina tímaritið sem hækkaði sölutölur sínar á árinu. Tímaritið seldi 100 þúsund eintökum betur í ár en í fyrra en Lady Gaga var á forsíðunni í ár á meðan gamanleikkonan Tina Fey þótti ekki nógu spennandi árið 2010. Aprílhefti þessa árs með poppstjörnunni Rihönnu á forsíðunni var líka vel heppnað og seldist vel.

Tímaritið Glamour, sem hefur þurft að berjast fyrir lífi sínu á þessu ári vegna lækkandi sölu, getur aldeilis þakkað Kim Kardashian. Hún var í forsíðuviðtali í ágústhefti blaðsins sem hefur hækkað sölutölurnar um helming.