Hlakkar til að gefa

Beckham-fjölskyldan verður seint sökuð um að hata sviðsljósið. Og hún virðist aldrei þreytast á að tala um fjölskyldulífið sitt. Þannig hefur David Beckham upplýst að hann hlakki mikið til að gefa nýfæddri dóttur sinni að borða. Victoria, eiginkona Davids, hefur haft stúlkuna á brjósti eins og lög gera ráð fyrir en er nú farin að mjólka sig og setja móðurmjólkina á pela.

„Brjóstagjöfin er virkilega mikilvæg en nú er ég farinn að geta gefið henni pela. Og það er ótrúlegt.“ Knattspyrnukappinn upplýsir einnig að fjölskyldan sé alltaf í fyrirrúmi hjá þeim hjónum, ekkert sé mikilvægara en hún.