Stöðvun Norðlingaölduveitu kostar Landsvirkjun 11-12 milljarða króna

Tjón Landsvirkjunar við að missa Norðlingaölduveitu nemur ellefu til tólf milljörðum króna, samkvæmt tölum byggðum á gögnum fyrirtækisins. Auk þess yrði Landsvirkjun af miklum framtíðartekjum ef hætt verður við þennan hagkvæmasta orkukost landsins.

Þessi umdeilda framkvæmd fellst í því að stífla Þjórsá við Norðlingaöldu, um átta kílómetrum neðan friðlands Þjórsárvera, og dæla hluta vatnsins um jarðgöng í átt til Þórisvatns. Þetta er því ekki ný virkjun heldur vatnsveita sem eykur raforkuframleiðslu í virkjunum við Vatnsfell, Sigöldu, Hrauneyjar og Búðarháls.

Ríkisstjórnin boðar nú að áformin verði endanlega slegin af, með þeim rökum að veitan feli í sér röskun á lítt snortnu svæði í jaðri Þjórsárvera og hafi áhrif á sérstæða fossa í Þjórsá. Þar með er hafnað þeim sjónarmiðum að veitan verði ásættanleg við það að minnka Norðlingaöldulón út fyrir friðlandsmörk Þjórsárvera, og að ásýnd fossanna verði haldið með lágmarksrennsli á sumrin.

Hörður Arnarson, forstjóri Landsvirkjunar, sagði í dag að fyrirtækið ætlaði ekki að sinni að tjá sig um einstaka kosti í rammaáætlun.

Í greinargerð fyrir hartnær sex árum, sem gerð var á verðlagi í ársbyrjun 2005, rakti Landsvirkjun hins vegar fjárhagslegt tjón sitt ef fallið yrði frá Norðlingaölduveitu. Bókfærður áfallinn kostnaður var þá kominn í 630 milljónir króna, sem jafngildir um 1.150 milljónum í dag, miðað við framreiknaða byggingavísitölu. Mesta tapið reiknaðist verða við það að virkja þyrfti dýrari kosti í staðinn, og mat Landsvirkjun heildartap sitt, ef hætt yrði við Norðlingaölduveitu, upp á sex til sex og hálfan milljarð króna. Að núvirði eru það á milli ellefu og tólf milljarðar króna.

Norðlingaölduveita myndi kosta 17,3 milljarða króna, framreiknuð, og skila 720 gígavattstundum á ári. Áætla má að Landsvirkjun gæti selt þá orku fyrir 2,5 til 3 milljarða króna á ári og myndu tekjurnar greiða upp kostnaðinn, með vöxtum, á innan við áratug. Til viðbótar við beint tap og kostnaðarauka yrði fyrirtækið þannig einnig af umtalsverðum framtíðartekjum.