Smávaxin stúlka með stóra rödd

Hin breska Amy Winehouse lést aðeins 27 ára gömul á heimili sínu í London fyrir viku. Söngkonan sem barðist við áfengis- og eiturlyfjafíkn í mörg ár fyrir opnum tjöldum.

Þrátt fyrir að margir hafi talið fráfall Amy Winehouse óumflýjanlegt, í ljósi áralangrar baráttu hennar við áfengis- og eiturlyfjafíkn sem fór að stórum hluta fram fyrir augum almennings, voru ýmsir á þeirri skoðun í byrjun þessa árs að söngkonan væri óðum að komast í það form sem aflaði henni gríðarlegra vinsælda og aðdáunar tónlistarunnenda um allan heim nokkrum árum fyrr.

Í janúar hélt hún fimm tónleika í Rio de Janeiro í Brasilíu og var mál manna að þar hefði brugðið fyrir sýnishorni af þeim miklu hæfileikum sem vímuefnaþokan hafði haldið í felum of lengi. Í byrjun júní, strax að lokinni stuttri dvöl á enn einni meðferðarstofnuninni, söng Winehouse sjö lög fyrir lítinn hóp vina og vandamanna á hinum fræga tónleikastað 100 Club á Oxford Street í London. Í samtali við blaðamann Guardian segist einn viðstaddra hafa verið þess fullviss að söngkonan væri komin á beinu brautina, í flestum skilningi, þetta kvöld. Í minningarræðu um dóttur sína sagði Mitch Winehouse, faðir Amy, þetta hafa verið frábært kvöld. Að rödd Amy hefði verið góð og hnyttni og tímasetningar í fullkomnu lagi.

Aðeins sex dögum síðar hóf Winehouse hljómleikaferð um Evrópu sem marka átti veglega endurkomu hennar á sjónarsviðið á réttum forsendum. Á fyrstu tónleikunum í Belgrad í Serbíu kom hún klukkutíma of seint á svið og áberandi drukkin í ofanálag. Winehouse virtist eiga í mestu erfiðleikum með að muna textana í lögum sínum, muldraði í stað þess að syngja og var að lokum bauluð niður af sviðunu af vonsviknum áhorfendum. Hljómleikaferðalagið var blásið af og umboðsmenn Winehouse gáfu út þá yfirlýsingu að henni yrði gefinn eins langur tími og nauðsynlegur væri til að ná sér aftur á strik.

Í samtali við Guardian segjast vinir söngkonunnar hafa verið afar hissa á uppákomunni, því allt hefði virst á uppleið hjá Winehouse í undanfara ferðarinnar. Aðeins rúmum mánuði síðar var hún látin. Nákvæm dánarorsök er enn ókunn, þrátt fyrir linnulausar getgátur fjölmiðla.