"Þarna verða allir snargeðveikir án þess að vera á eyrunum"

"Þetta er hátíð fyrir þá sem telja að áfengi og hugleiðsla fari ekki saman, né fíkniefni og fjallganga og að það hæfi ekki að drekka í útilegum með börnum frekar en í fermingarveislum eða barnaafmælum," segir Gunnar Smári Egilsson, formaður SÁÁ, um edrú útivistarhátíðina Sjálfstætt fólk sem haldinn verður að Hlöðum í Hvalfirði um verslunarmannahelgina, 29. júlí til 1. ágúst.

Meðal listamanna sem fram koma á hátíðinni eru KK, Valdimar, Vintage Caravan, Of Monsters and Man, Lockerbie, Jónas Sig og ritvélar framtíðarinnar, plötusnúðarnir Addi Exos og Stefán P. Jones. Þá verður boðið upp á varðeld, kvöldvöku, sundlaugadiskó, söng, gleði og gaman.

"Þarna verða allir snargeðveikir án þess að vera á eyrunum," segir tónlistarstjóri hátíðarinnar, Freyr Eyjólfsson útvarpsmaður og tónlistarmaður, en markmiðið er að bjóða upp á holla og kraftmikla félagslega, andlega og líkamlega næringu og skemmtun sem allir aldurshópar geta notið saman.

Mikið verður gert fyrir krakka. Það verða leikir, kappát, íþróttamót, listasmiðja, spurningakeppni, knúskeppni, brennó, blautt boðhlaup, sultuhlaup og fleira. Margrét H. Blöndal fer með börn í móaferð, týnir jurtir og málar myndir, Leikhús Lottu mætir og líka Björgvin Franz og félagar.

Þá verður sérstök áhersla lögð á andlegu hliðina. Meðal þess sem verður í boði eru Brahma Kumris hugleiðslur, 12 spora fundir, svett, Gundalini hugleiðslur, Halla himintungl mætir með tjaldið sitt, Sigga Klingenberg spáir fyrir gesti, Gunnar Eyjólfsson stýrir og kynnir Qi Gong.

Og eins og það sé ekki nóg þá mun Þorsteinn Jakobsson fara fyrir miðnæturgöngu á Glym, farið verður í sjósund, morgunleikfimi, gengið á Þyril og Þorvaldur Þorsteinsson flytur fyrirlestur um gleði og gæsku svo eitthvað sé nefnt.

Á svæðinu er bæði sundlaug, golfvöllur og stangveiði. Stutt er í kajakróður og náttúrulaug.

Það kostar aðeins 3.900 krónur fyrir 14 ára og eldri yfir alla hátíðisdaganna. Dagpassar eru í boði á 1.500 krónur fyrir skreppitúra úr bænum.

Öll vímuefni bönnuð og það mun ekki sjást vín á nokkrum manni.