Hvalveiðar snúast um sjálfstæði Íslendinga

Jón Bjarnason, sjávarútvegsráðherra, segir hvalveiðar Íslendinga snúast um sjálfstæði þjóðarinnar og verði ekki gefnar eftir þrátt fyrir að veiðarnar samræmist ekki stefnu ESB. Þetta kemur fram í frétt Al Jazeera um hvalveiðar Íslendinga.

Í frétt Al Jazeera er Ísland sagt ein síðasta hvalveiðiþjóð heims og að stærsti hluti tekna Íslendinga í tengslum við hvali komi nú ekki í gegnum hvalveiðar heldur hvalaskoðun. Fréttamaður Al Jazeera segir þó hvalaskoðunina kaldhæðnislega í ljósi þess að það fyrsta sem ferðamennirnir geri þegar komið sé í land, sé að fara á veitingastaði og gæða sér á hvalkjöti.

Fram kemur að yfir hundrað veitingastaðir í Reykjavík bjóði nú upp á hvalakjöt í ýmsu formi, allt frá hrefnusteikum til sushi. Það þýði að hvalir séu veiddir til að seðja hungur og forvitni ferðamanna sem borgi einnig fyrir að sjá hvalinn í sínu náttúrulega umhverfi. Þetta sé þó ekki óumdeilt.

Fréttamaðurinn hittir Sigurstein Másson, talsmann Animal Welfere fund, en samtökin hafa vakið athygli fyrir auglýsingar sínar gegn hvalveiðum, meðal annars í Leifsstöð. Slagorð samtakanna er: Meet us, don´t eat us. Eða Hittið okkur í stað þess að leggja okkur til munns. Sigursteinn segir það áfangasigur að færri veitingastaðir en áður auglýsi nú hvalkjöt á matseðlum sínum.

Einnig er rætt við hvalveiðimenn sem egjast ætla að bjóða upp á sínar eigin ferðir þar sem ferðamenn geti fylgst með lífi hvalveiðimannsins og jafnvel séð hval skotinn á hafi úti.

En á alvarlegri nótum er fjallað um ESB umsókn Íslendinga og að hvalveiðar séu ósamrýmanlegar stefnu Evrópusambandsins. Jón Bjarnason sjávarútvegsráðherra, sem kynntur er til sögunnar sem lykilmaður í andstöðunni við Evrópusambandið, segir í viðtalinu að hvalveiðar séu hluti af sjálfstæði þjóðarinnar. „Þetta er okkar land og okkar hagsmunir sem við hugsum um og við munum standa vörð um þessa hagsmuni,“ segir Jón Bjarnason.