60 metrar í land

Smíði nýrrar brúar yfir Múlakvísl hefur gengið vel undanfarna daga og er nú reiknað með að unnt verði að opna brúna fyrir umferð á morgun eða á sunnudaginn. Nú á brúin einungis eftir um 60 metra í land.

Eftir að búið verður að veita ánni undir nýju bráðabrigðabrúna, sem gert verður síðdegis í dag föstudag eða klukkan fimm, verður staðan metin með tilliti til þess hvenær hægt verður að hleypa umferð á brúna og opna þar með Hringveginn að nýju.

Tímasetningar á þessari opnun verða þó ekki endanlegar fyrr en á laugardagsmorgun, en ljóst er að vegagerðarmenn hafa látið hendur standa fram úr ermum þar sem upphaflega var talið að ekki yrði unnt að opna brúna fyrr en eftir tvær til þrjár vikur.