Sauðfjárbændur hækka verðskrá um 25%

Landssamtök sauðfjárbænda hafa ákveðið að hækka verðskrá sína um 25% fyrir árið í ár.

Að baki því liggur að markaðsaðstæður hafa verið góðar fyrir sauðfjárafurðir undanfarin misseri, að því er segir í tilkynningu frá samtökunum. Sindri Sigurgeirsson formaður Landssamtaka sauðfjárbænda segir að núna selji sauðfjárbændur um 40% af framleiðslu sinni til útlanda.

Aðspurður um hvort þetta þýði ekki samsvarandi hækkanir til neytenda hérlendis segir Sindri að svo þurfi ekki að vera. Afurðastöðvarnar ráði verðinu til neytenda og þær hafa ekki gefið út neinar verðskrár. Þar að auki sé verðskrá sauðfjárbænda ekki bindandi fyrir afurðastöðvarnar.

„Útflutningur hefur aukist stórum og verð farið hækkandi í erlendri mynt, vegna aukinnar eftirspurnar. Meðalverð fyrir útflutt kjöt, innmat og gærur hefur hækkað langt umfram áhrif gengisfalls krónunnar ef miðað er við þróun frá haustinu 2008. Eftirspurn innanlands hefur verið á svipuðu róli undanfarin tvö ár og birgðir eru í lágmarki," segir í tilkynningunni.

„Verð til bænda hefur ekki endurspeglað þessa þróun. Hækkun bændaverðs hefur verið svipuð almennri verðlagsþróun undanfarin ár, en bændur hafa þurft að taka á sig aðfangahækkanir langt um fram það. Til dæmis hefur áburður þrefaldast í verði frá 2005 og olía hækkað um 233% á sama tíma.

Breytilegur kostnaður á sauðfjárbúum hefur tvöfaldast frá 2005 og heildarrekstrarkostnaður hækkað um 174%, eða þrefalt meira en almennt verðlag á sama tímabili. Í ljósi góðra aðstæðna á markaði telja sauðfjárbændur því vera svigrúm til að afurðaverð hækki verulega í haust til að koma til móts við það sem greinin hefur þurft að taka á sig undanfarin misseri."