Leggur í langferð á vespunni

Arngrímur Borgþórsson, landshornaflakkari og vespugæi, ætlar nú í vikunni að leggja upp í langferð frá Norðurmýrinni í Reykjavík og rúlla sér alla leið á Lónsöræfi austan Vatnajökuls.

Arngrímur ætlar að pakka litlu fyrir ferðina; verður með svefnpoka á bögglaberanum og kaffibrúsa og smurt nesti í bakpoka. Hann gefur puttaferðalöngum líklega ekki far, allavega ekki lengri leiðir, enda hægir vespan á sér ef tvímennt er á henni. Á leiðinni austur á Arngrímur von á því að upplifa þjóðveginn og landslagið í meiri nálægð en bílafólkið sem tekur fram úr honum en sjálfur tekur hann fram úr hjólatúristum.

Vespur eru greinilega ekki eingöngu borgarhjól. "Ég hef farið út um allt á minni vespu. Kem henni upp í níutíu og held löglegum hraða. Í brekkum kemst hún hraðar ef ég er búinn að borða lítið, þá kem ég henni upp í hundrað," kímir Arngrímur vespu sinni til hróss og talar í hana kjark: "Það eru aðeins torfærur þarna inn í Lón en á illfærum vegum fer ég rólega yfir, svona á þrjátíu," segir Arngrímur, sem þarf ekki að hafa áhyggjur af miklum bensínkostnaði.

"Ég hef ekki reiknað út hverju vespan eyðir á hundraðið. En ég veit að ég þarf ekki nema 600 krónur á viku til að komast í og úr vinnu á hverjum degi og ég býst við að bensínkostnaður í ferðinni austur verði undir 2.500 krónum," segir Arngrímur ánægður með lífið.

nielsg@365.is