Innlent

Almannavarnir vara fólk við Heklu

Jón Hákon Halldórsson skrifar
Þrýstingur í kviku undir Heklu hefur vaxið síðan í síðasta gosi og nú síðustu ár hefur hann verið svipaður eða hærri en á undan síðustu gosum, segir almannavarnadeild Ríkislögreglustjóra. Því verði að telja að eldstöðin sé tilbúin í gos.

Almannavarnir segja að í síðustu eldgosum hafi jarðskjálftar mælst um eina klukkustund á undan þeim og þegar síðast gaus í Heklu gátu vísindamenn spáð fyrir um gosið með um einnar klukkustundar fyrirvara. Vegna þessara skömmu fyrirvara sé full ástæða fyrir fólk að hafa allan vara á í nágrenni Heklu, nú sem endranær.

„Hekla og nágrenni hennar eru mjög vinsæl til útivistar en frá fjallinu er mjög gott útsýni í góðu skyggni. Það er ágæt regla fyrir þá sem ætla á fjallið að fá ættingja eða vini til þess að fylgjast með fjölmiðlum á meðan á göngunni stendur. Ef vísbendingar koma um að gos sé að hefjast í Heklu er þeim upplýsingum komið til fjölmiðla eins fljótt og hægt er og geta þá ættingja og vinir hringt í göngumenn og komið boðum til þeirra," segir í yfirlýsingu almannavarna.

Almannavarnir taka þó skýrt fram að fjallið sé komið á tíma sjá vísindamenn ekki neinar sérstakar vísbendingar sem benda til þess að gos sé yfirvofandi. Síðustu dagana hafa GPS-landmælingatæki á Heklusvæðinu sýnt óvanalegar jarðskorpuhreyfingar sem túlka má sem afleiðingu af kvikuhreyfingum djúpt í rótum fjallsins. Engir jarðskjálftar hafa fylgt þessum færslum og jarðskorpuhreyfingarnar hafa að nokkru gengið til baka.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.