Ólafur Elíasson: Veitir sér meðferð vegna óánægju

„Ég er að reyna að veita sjálfum mér meðferð vegna þess hve ótrúlega óánægður ég er með að húsið sé óklárað," segir listamaðurinn Ólafur Elíasson í viðtali við Grapevine.

Listamaðurinn gagnrýnir að Harpan hafi verið opnuð þrátt fyrir að framkvæmdum við húsið sé ekki lokið. Forsvarsmenn Hörpunnar segja starfsemina hafa haft forgang.

Þó búið sé að opna hörpuna er enn margt óklárað. til dæmis listaverk Ólafs Elíassonar, þessi glerhjúpur, en um hálft ár er þangað til hann verður tilbúinn.

Ólafur tjáir sig í fyrsta skipti um aðkomu sína að hörpunni í viðtali við blaðið Reykjavík Grapevine.

Í viðtalinu segir Ólafur að fyrir hrun hafi húsið tekið mið af smekk fjárfestanna en á endanum hafi áherslan orðið frekar á notagildi hússins, byggingarefnum hafi verið breytt til að spara pening og Ólafur segir að á endanum hafi þjóðin fengið heiðarlegri byggingu fyrir vikið þar sem notagildi hafi vikið fyrir íburði.

En Ólafur er líka gagnrýninn.

Sannleikurinn sé sá að opnunartónleikar Hörpunnar fari í raun fram á vinnusvæði og fáir átti sig á að hans framlag, glerhjúpurinn, sé langt frá því að vera tilbúinn. Þá gagnrýnir hann stjórnendur Hörpunnar fyrir skort á upplýsingum.

„Mér finnst það mjög sorglegt að ein spurning sem ég þarf iðulega að svara á ferðum mínum er : Hvað varð um tónlistarhúsið á Íslandi?"

Forsvarsmenn Hörpunnar vildu ekki veita fréttastofu viðtal vegna málsins en sögðu sátt ríkja meðal stjórnenda Hörpunnar og Ólafs en listamaðurinn heimsfrægi kemur til Íslands á morgun til að vera viðstaddur opnunarhátíð hússins.