Verða að vanda orðaval sitt til að endurreisa virðingu Alþingis

Þingmenn verða að vanda orðaval sitt og beita sér fyrir málefnalegri umræðu til að hægt sé að endurreisa virðingu Alþingis. Þetta kom fram í máli þingmanna á Alþingi í dag.

Þráinn Bertelsson, þingmaður Vinstri grænna, hefur verið harkalega gagnrýndur fyrir að kalla þingkonur sjálfstæðiflokks fasistabeljur eftir fund þingvallanefndar í síðustu viku.

Gunnar bragi Sveinsson, þingmaður framsóknarflokks, gerði þetta að umtalsefni við upphaf þingfundar í morgun.

„Sú framganga sem við urðum vitni að fyrir skemmstu þegar höfð eru uppi stór orð um aðra þingmenn, kallaðir illum nöfnum, jafnvel mjög niðrandi nöfnum sem bera vott um ákveðna fyrirlitningu það er ekki okkur til sóma," Gunnar Bragi.

„Það er óþolandi að verða vitni að þessu. Þetta setur alla þingmenn á sama stall sem er óásættanlegt."

Aðrir þingmenn tóku undir þetta og sögðu ljóst að þingmenn verði að vanda orðaval sitt betur til að hægt sé að endurreisa virðingu alþingis.

„En vandinn virðulegi forseti virðist vera sá að nokkrir háttvirtir þingmenn virðast sjá sér hag í að halda málum í átakaferli og ganga of langt í þeirri hagsmunagæslu. Svo langt að framkoman skaðar þingið," sagði Oddný G. Harðardóttir, þingmaður Samfylkingarinnar.

„Það er núna að störfum þingskapanefnd sem er að fara yfir þingsköp alþingis og meðal annars er tekið á því að setja siðareglur hér á alþingi og ég held að það sé vel og vona að við munum í framtíðinni vinna samkvæmt því," sagði Þuríður Bachman, þingmaður Vinstri grænna.