Sömu sæti í rútunni annað kvöld - frábær stemning í hópnum

"Það er frábær stemning í hópnum og þetta leggst svo vel í okkur, við erum svo ánægð að vera komin í úrslitin," Benedikt Brynleifsson, trommari í Vinum Sjonna, en stóra stundin hjá þeim félögum er annað kvöld þegar sjálft úrslitakvöldið fer fram í Eurovision.

Benedikt segir að nokkrir meðlimir í Vinum Sjonna hafi orðið ansi hásir þegar ljóst var á þriðjudagskvöld að Ísland kæmist áfram úr fyrri undanúrslitariðlinum. „Það var tekið vel á því þá, en það eru allir orðnir heilir núna," segir hann. Hópurinn ætlar ekki að breyta atriðinu fyrir útslitakvöldið og því eiga áhorfendur heima von á því að Matti kyssi Vigni gítarleikara aftur. „Það verður ekkert óvænt, þetta virkaði svo vel á þriðjudag þannig við ætlum bara að halda því."

Hópurinn er búinn að koma sér upp ákveðinni rútína úti í Þýskalandi. „Við byrjum á því að fara í gufuna og pottinn á hótelinu, það hefur reynst okkur vel. Það er þægilegt að byrja daginn á því. Svo verða sömu sæti í rútunni á morgun og sömu upphitunarlög verða spiluð," segir Benedikt sprækur.

Þó að úrslitakvöldið sé á morgun þá er kvöldið í kvöld ekki síður mikilvægt því þá er svokallað dómarakvöld. „Þar gefa dómarar sín stig á móti símakosningunni, það er alveg eins mikilvægt," segir Benedikt.

Hann segir að hópurinn sé mjög vel liðinn úti og margir hafi gefið sig á tal við þá sem vilji spjalla. Og eins og allir Eurovison-aðdáendur ættu að vita þá er strákahljómsveitin Blue að keppa fyrir Bretland og segir Benedikt að þeir hafi spjallað við þá aðeins. „Þeir eru mjög fínir náungar og ekki með neina stjörnustæla,"

Strákarnir stíga á svið á morgun og verða númer 21 í röðinni.