Niðurstaðan mikilvægur varnarsigur

Matsfyrirtækið Standard & Poor´s staðfesti í dag óbreytta lánshæfiseinkunn fyrir skuldbindingar Ríkissjóðs Íslands í erlendum gjaldeyri. Matshorfurnar verða hins vegar áfram neikvæðar. Fjármálaráðherra segir niðurstöðuna mikilvægan varnarsigur.

Matseinkunnir ríkissjóðs hafa nú verið teknar af athugunarlista sem þær voru settar á í kjölfar Icesave atkvæðagreiðslunnar.  Þessi ákvörðun kemur í kjölfar ákvörðunar Fitch í gær að breyta horfum á lánshæfi Íslands úr neikvæðum í stöðugar.

„Þannig að í það heila tekið þá held ég að þetta hafi tekist eins og við gátum búist við og það hafi unnist varnarsigur í þessarri glímu við matsfyrirtækin. Þá þarf bara að halda áfram á sömu braut, að koma því betur á framfæri að hagkerfið er að rétta úr kútnum og Ísland er að ná vopnum sínum í efnahagslegu tilliti," segir Steingrímur J. Sigfússon, fjármálaráðherra.

Að mati Standard and Poors hefur dregið úr hættu á að Ríkissjóður Íslands lendi í vandræðum vegna erlendrar lánsfjármögnunar. Neikvæðar horfur á matinu endurspegla hins vegar hættu á að efnahagsbati og skuldalækkun ríkissjóðs verði ekki sem skyldi.

Fjármálaráðherra segir þetta gefa tækifæri til að skoða erlenda skuldabréfaútgáfu á næstu misserum.

„Nú getum við farið að dusta rykið af því sem við höfum haft á ís í býsna langan tíma, að fara að sýna umheiminum að við séum komin í þá stöðu að við getum sótt okkur lánsfé eftir því sem við þurfum og að tengsl okkar við fjármálaumheiminn séu orðin eðlileg."

Hörður Arnarson forstjóri Landsvirkjunar sagði í samtali við fréttastofu í dag að ákvörðun S og P sé mjög jákvætt skref fyrir erlenda fjármögnun Búðarhálsvirkjunar. Hann segir útlit fyrir að lán sem Landsvirkjun fékk til framkvæmda fyrr á árinu séu nú í höfn en lánin voru beint eða óbeint háð því að lánshæfismat Íslands héldis óbreytt.