Ráðist að heimili Ögmundar

Ráðist var að heimili Ögmundar Jónassonar innanríkisráðherra í fyrrinótt. Fjölmennt lið lögreglu var kallað á staðinn þar sem talið var að um umsátur væri að ræða. Öryggi ráðherrans var tryggt með aðgerðum lögreglunnar.

Tvær rúður brotnuðu í árásinni svo glerbrotum rigndi inn í íbúðina. Mikill styr hefur staðið um málefni hælisleitenda undanfarna daga eftir að pólitískur flóttamaður reyndi að kveikja í sér í húsnæði Rauða krossins á föstudag.

Ögmundur Jónasson sagði í samtali við fréttastofu nú fyrir hádegi að hann vissi ekki um tengsl milli árásarinnar og þessara innflytjendamála.