16 ára stúlka féll ofan af Golden Gate brúnni og lifði það af

16 ára gömul stúlka, sem féll ofan af Golden Gate brúnni í San Francisco, lifði fallið af. Það eru rétt tæplega 70 metrar af brúnni og niður að haffletinum, en til samanburðar má benda á að Hallgrímskirkja er 74,5 metrar á hæð.

Stúlkan féll niður af brúnni á sunnudaginn og var í tuttugu mínútur í sjónum áður en henni var komið til bjargar. Samkvæmt dagblöðum í borginni var hún umsvifalaust færð á spítala. Ekki er ljóst hversu illa slösuð stúlkan er.

Í mars síðastliðnum féll 17 ára piltur niður af brúnni og lifði fallið einnig af.

Ekki er vitað hvort stúlkan hafi ætlað að svipta sig lífi en brúin er alræmdur sjálfsvígsstaður í Bandaríkjunum. Um 25 manns deyja árlega eftir að hafa stokkið ofan af brúnni.