Fyrsta íslenska útrásin var falin í skjalasafni

Nýjasta heimildarmynd Þorsteins J., Iceland Food Centre - íslenska útrásin, verður frumsýnd á Stöð 2 á páskadag.

Myndin er saga íslensks veitingastaðar sem var opnaður í desember 1965 við Regent Street og var aðeins opinn í 18 mánuði. Hún er byggð á gögnum sem Sólveig Ólafsdóttir sagnfræðingur fann í skjalasafni fjármálaráðuneytisins fyrir margt löngu. Í þessum gögnum er saga hlutafélagisns sem ríkið átti helmingin í rakin, frá mars 1965 og þangað til félaginu er slitið 1977.

„Þetta er efni sem á erindi við alla þjóðina, spennandi, skemmtileg og afar fræðandi mynd, og ekki seinna vænna að við skoðum aðeins söguna. Hún kemur einsog fagnaðarerindi inní þessa þjóðfélagsumræðu um opinbera stjórnsýslu'' segir Þorsteinn.

Tökur á myndinni hófust í London í október 2009 og hafa staðið yfir með hléum fram í mars á þessu ári.

„Það sem er forvitnilegt við myndina finnst mér, er að í henni fáum við að sjá inní heim sem er lokaður almenningi. Þetta er heimur skjalasafnsins, sem geymir söguna. Og jafnvel þótt við fengjum leyfi til að fara þarna inn, þá hefðum við ekki hugmynd um að hverju við ættum að leita. Þess vegna er þessi rannsókn Sólveigar merkileg, hún veitir okkur innsýn í hugmyndina að stofnun staðarins, reksturinn og hvernig tapið var svo loks gert upp. Jafnframt er ég með viðtöl við fjölda manns sem komu að rekstri staðarins, þjónustustúlkur, yfirþjóninn, kokkinn og fleiri sem þekktu til með einum eða öðrum hætti," segir Þorsteinn.

Tökumaður myndarinnar er Bjarni Felix Bjarnason, tónlistin er frumsamin eftir Pétur Grétarsson, Hjörtur Grétarsson sá um hljóð, Freymar Þorbergsson grafík og Eiríkur Ingi Böðvarsson hafði umsjón með litaleiðréttingu og samsetningu.