„Þetta er enn frekari staðfesting á þeirri óeiningu sem ríkt hefur í stjórnarsamstarfinu. Það hefur myndast djúp gjá um grundvallarmál,“ segir Bjarni Benediktsson, formaður Sjálfstæðisflokksins, um úrsögn Lilju Mósesdóttur og Atla Gíslasonar úr þingflokki VG.

Þingmennirnir tilkynntu skyndilega í morgun um úrsögn sína og héldu í kjölfarið blaðamannafund í Alþingishúsinu. Þar kom meðal annars fram að þau hafi sagt sig úr þingflokknum vegna grundvallarmála eins og umsókn inn í ESB, samstarfið við Alþjóðagjaldeyrissjóðinn og Icesave.

„Mér finnst mun heiðarlegra að þau gangi úr þingflokknum en að sitja í þingflokki sem segist vilja verja ríkisstjórnina falli en standi á móti henni,“ segir Bjarni og bætir við að honum finnist þau einfaldlega ganga hreint til verks.

Hann segir stöðuna nú í raun sýna að stjórnarsamstarfið sé að veikjast smá saman.

„Þetta er í raun enn eitt áfallið fyrir ríkisstjórnina á löngum hrakfallaferli,“ segir Bjarni.

Spurður hvort úrsögn þeirra komi honum á óvart svarar Bjarni því til að það komi honum frekar á óvart að það séu þó 33 sem styðji ríkisstjórnina.

„Þetta sýnir að þau þurfa bara að fara breyta um stefnu. Það er komið að þeim tímapunkti,“ segir Bjarni og á þá við grundvallaratriði líkt og ESB, AGS og atvinnumál og svo framvegis.

Aðspurður hvort það komi til greina að Sjálfstæðisflokkurinn komi með einhverjum hætti að samstarfi ríkisstjórnarinnar, segir Bjarni ekkert slíkt vera í umræðunni.

„Ég hef oft sagt að nú þurfi menn að einbeita sér að þjóðarhag og það gerum við með því að einbeita okkur að fáum verkefnum og flýta kosningum,“ segir Bjarni. Hann segist hinsvegar hafa alvarlegar áhyggjur af framvindu mála vegna ríkisstjórnarinnar.

„Hér er algjör stöðnun í atvinnulífinu og enginn hagvöxtur. Ég hef miklar áhyggjur af framvindu mála.“