Forstjóri CCP biður notendur Eve afsökunar

Hilmar Veigar Pétursson, forstjóri CCP, hefur beðið notendur tölvuleiksins EVE Online opinberlega afsökunar á vefsvæði sínu. Bréfið er óvenju einlægt miðað við bréf frá forstjóra í tölvugeira og hefur vakið mikla athygli hjá vefsíðum sem fjalla um tölvuleiki.

CCP lenti í miklum vandræðum fyrr á þessu ári þegar innanhússbréf fyrirtækisins lak til notenda EVE Online en þar voru meðal annars reifaðar hugmyndir um að gera fólki kleift að kaupa sér aukin völd inni í leiknum með venjulegum peningum. Trúir og tryggir notendur urðu æfir og hótuðu að segja upp áskrift sinni enda tekur það marga mánuði að byggja upp veldi í leiknum.

En nú hefur Hilmar sem sagt beðist afsökunar á þætti sínum í málinu og viðbrögðum. „Sú gjá sem notendur hafa upplifað að hafi myndast milli þeirra og CCP er mér að kenna og mér þykir það leitt,“ skrifar Hilmar en hann byrjar bréfið á því að segja að síðastliðnir mánuðir hafi verið honum lærdómsríkir. Hann hafi leitað mikið inn á við og komist að því að það sé honum nauðsynlegt að hreinsa andrúmsloftið. Hilmar biðlar jafnframt til notenda að þeir sýni honum þolinmæði. „Ég var óþolinmóður þegar ég átti að vera varkár […] og hrokafullur þegar ég átti að vera auðmjúkur.“

Forstjórinn segist hafa verið þrjóskur og barið hausnum við steininn þegar honum var bent á mistök. „Þið [notendurnir] hafið talað hátt og skýrt bæði í orði og á borði. Og það eru vissulega mikilvæg augnablik þar sem ég vildi að ég hefði hlustað og tekið aðrar ákvarðanir. Ég hafði rangt fyrir mér og ég viðurkenni það.“

- fgg