Íslenskri nýklassík hampað

Íslenskir flytjendur eru áberandi í heilsíðuumfjöllun á menningarsíðu breska blaðsins Sunday Times um síðustu helgi. Þar er fjallað um nýja tegund lagahöfunda sem notast við sígilda tónlist í sköpun sinni. Einnig er rætt um að lagahöfundar þurfi ekki lengur að vera á sama stað ætli þeir að semja saman lög eða taka þau upp. Þar hafi netið komið inn í staðinn.

Á meðal þeirra sem beint er sjónum að í greininni eru hljómsveitirnar Amiina og Sigur Rós, tónlistar­mennirnir Ólafur Arnalds og Jóhann Jóhannsson og fyrirtækið Bedroom Community með þá Valgeir Sigurðsson og Nico Muhly innanborðs.

Spjallað er við Ólaf Arnalds þar sem hann lýsir sinni tónlistarsköpun. „Tónlist mín á rætur sínar að rekja til sígildrar tónlistar en einnig til alls konar nútímalegrar tónlistar, enda hef ég hlustað á popp-, raf- eða danstónlist allt mitt líf," sagði Ólafur. Hann telur tónlist sína ekki passa inn í hefðbundna skilgreiningu á sígildri tónlist, nema þá staðreynd að hann notist við sígild hljóðfæri þegar hann flytur lögin sín. Hann vill frekar skilgreina tónlistina sem nýklassík eða síðklassík.

Greinin í Sunday Times er enn ein rósin í hnappagat íslenskrar tónlistar, sem hefur átt vaxandi fylgi að fagna erlendis á undanförnum árum. - fb