Mugison föndrar enn

Tónlistarmaðurinn Mugison er þekktur fyrir að fara sínar eigin leiðir við hönnun á plötuumslögum sínum. Platan Lonely Mountain kom út í 300 eintökum í pappaumslögum sem hann saumaði sjálfur í saumavél, umslag Mugiboogie braut hann sjálfur saman ásamt vinum sínum og í fyrrakvöld var enn komið að föndurstund hjá Mugison.

Á Facebook-síðu sinni auglýsti hann eftir áhugasömum föndrurum til að aðstoða sig við að klastra saman umslögunum utan um nýjustu afurðina, plötuna Haglél. Síðar um kvöldið bárust á síðunni fréttir af því að föndruð hefðu verið 2.500 til 3.000 eintök.