Tom Cruise leikur Jack Reacher

Aðdáendur bóka Lee Child um hermanninn fyrrverandi, Jack Reacher, geta glaðst yfir því að von er á kvikmynd upp úr einni sögunni. Ekki er þó víst að þeir verði allir jafn glaðir yfir því að Tom Hanks á að leika Reacher.

Jack Reacher er tröllvaxin drápsvél sem flakkar um Bandaríkin farangurslaus. Tom Cruise, einn minnsti leikarinn í Hollywood, velþekktur sérvitringur og kominn óþægilega nálægt fimmtugu, er því kannski ekki augljósasti kosturinn í hlutverkið. „Stærð Reachers í bókunum er myndlíking fyrir óstöðvandi kraft sem Cruise sýnir á sinn hátt,“ segir Child þegar hann er beðinn að svara gagnrýnisröddum aðdáenda.

Kvikmyndafyrirtækið Deadline hefur staðfest að það eigi í viðræðum við Cruise. Um er að ræða níundu bókina í röðinni, hún kallast One Shot á frummálinu, en alls hafa bækurnar fimmtán selst í um 40 milljón eintökum. Þrjár bókanna hafa komið út á íslensku; Í frjálsu falli, Friðlaus og nú síðast Fimbulkaldur, og hafa þær notið mikilla vinsælda.

Tökur eiga að hefjast í haust en leikstjóri er Christopher McQuarrie sem stýrði Cruise í Valkyrie.