Fernandez tekur við landsliði Ísrael

Franska goðsögnin Luis Fernandez hefur verið ráðinn landsliðsþjálfari Ísraels frá og með 1. maí og fram yfir undankeppni EM 2012.

Forráðamenn ísraelska knattspyrnusambandsins voru með ýmis járn í eldinum eftir að Dror Kashtan hætti með liðið.

Á meðal þeirra sem voru orðaðir við starfið voru Ronald Koeman, Jurgen Klinsmann og Roberto Donadoni.

„Það eru margir hæfileikamenn í þessu landsliði og ég er viss um að liðið mun ná árangri. Það er mikil framþróun í fótboltanum hérna. Ég veit samt að þetta verður ekki auðvelt verk en ég er samt viss um að ná árangri," sagði Fernandez kokhraustur.