Meireles ætlar að vinna titla með Liverpool

Portúgalski landsliðsmaðurinn Raul Meireles segist vera kominn til Liverpool til þess að vinna titla. Leikmaðurinn kom frá Porto á 11,5 milljónir punda.

Meireles spilaði sinn fyrsta leik fyrir Liverpool um síðustu helgi er hann kom af bekknum í markalausu jafntefli gegn Birmingham.

"Ég spilaði einu sinni á Anfield með Porto og tapaði 4-1. Það sem stendur upp úr í minningunni er hversu frábæri stuðningsmennirnir voru. Það segja allir í Portúgal að stuðningsmenn Liverpool séu þeir bestu á Englandi," sagði Meireles sem er byrjaður að safna punktum hjá stuðningsmönnunum.

"Ég hef einnig spilað á útivelli gegn Chelsea og Man. Utd en stuðningsmennirnir þar eru ekki eins öflugir og hjá Liverpool. Ég get ekki beðið eftir að spila á Anfield sem leikmaður Liverpool.

"Ég vil vinna titla með félaginu. Ég vann marga titla með Porto og vil halda því áfram. Ég tel okkur eiga möguleika á því enda með mjög sterkan hóp," sagði Portúgalinn.