Plötuð í Kolaportið í dúndur formi

„Þessi Kolaportsferð mín sem rataði á baksíðu Fréttablaðsins? Mér fannst það frekar fyndið," svarar Ágústa Johnson framkvæmdastjóri Hreyfingar spurð hvað hún var að vesenast í Kolaportinu um helgina.

„Það er margra vikna pöntunarfrestur á básum þarna og þegar kom svo að deginum hittist þannig á að hún þurfti að mæta í vinnu svo ég ákvað að drífa mig og fékk tvær með mér úr vinnunni í staðinn."

„Það gekk alveg framar vonum að selja, við komum allar út í mjög góðum plús. Mér finnst stórsniðugt að gera þetta ef maður er með slatta af ónotuðum eða lítið notuðum fötum og fylgihlutum."

„Þetta er góð endurvinnsla. Einhver nýtur góðs af því að geta keypt fatnað hræódýrt og seljandinn fær smá pening. Allir sáttir."

„Ég hef í gegnum tíðina iðulega gefið allan fatnað sem ég nota ekki í þeirri von að eitthvað nýtist öðrum en núna í kreppunni þegar allt hefur hækkað finnst mér tilvalið að búa til smá pening með þessum hætti."

„Ég er a.m.k. svakalega sátt við að hafa eytt helginni í þetta. Það var brjálað að gera hjá okkur, hittum fullt af fólki og við höfðum gaman af þessu," segir Ágústa.

En burtséð frá því áttu góð ráð til að hrista af sér slenið? „Það er einfalt!" svarar Ágústa án þess að hika og segir:

„Taka ákvörðunina , íþróttadótið í töskuna og mæta í ræktina. Það eru ótal valmöguleikar í boði."

„Til dæmis eru að hefjast fullt af spennandi námskeiðum í Hreyfingu í þessari viku fyrir byrjendur og lengra komna, konur og karla. Þetta snýst númer 1,2 og 3 um hugarfarið, að ákveða að gera breytingar á sínum lífsstíl, og taka skrefið."

„Um að gera að leita ráðlegginga hjá heilsuræktarstöðvum. Heitustu áherslurnar í heilsuræktargeranum eru t.d. snöggálagsþjálfun sem skilar meiri árangri en hefðbundin þjálfun á jöfnu álagi."

„Snöggálagsþjálfun myndar hinn eftirsótta eftirbruna sem þýðir að líkaminn heldur áfram að brenna auknum fjölda hitaeininga eftir að æfingu lýkur. Fullt af spennandi möguleikum. Bara að vinda sér í þetta," segir Ágústa að lokum. -elly@365.is