Jovanovic ætlar sér til Liverpool

Milan Jovanovic dettur ekki til hugar að reyna að koma sér frá því að ganga í raðir Liverpool. Rafael Benítez gekk frá kaupum á honum en hann fer til liðsins á frjálsri sölu. Hann hefur þegar samþykkt samning sem hann á eftir að skrifa undir og gengist undir læknisskoðun. Hann á aðeins eftir að fá atvinnuleyfi á Englandi áður en gengið verður frá viðskiptunum. Jovanovic kemur frá Standard Liege í Belgíu þar sem hann hefur verið einn besti leikmaður deildarinnar undanfarin ár. Hann hefur staðið sig vel með Serbíu á HM og skoraði meðal annars sigurmarkið í leiknum gegn Þjóðverjum.