Þrjóska heldur Baggalúti á lífi

„Sumarfríið var mjög gott, bæði fyrir okkur og sérstaklega fyrir lesendur. Núna erum við búnir að hlaða öll hugsanleg batterí," segir Bragi Valdimar Skúlason, Baggalútur.

Vefsíðan vinsæla Baggalutur.is er komin aftur af stað eftir sumarfrí, mörgum netverjum til mikillar ánægju. Útlit síðunnar hefur verið endurbætt auk þess sem fleiri myndbönd verða í boði en áður. „Við ákváðum á stjórnarfundi að veita auknum fjármunum og tíma í sjónvarpsframleiðslu. Íhaldssami lesendaarmurinn verður örugglega arfareiður," segir Bragi, sem er spenntur fyrir vetrinum: „Við sáum fram á sóknarfæri þegar Spaugstofan er horfin en það er horfið aftur. Við vorum að vonast til að þetta yrði okkar ár en, nei, það er ekki því að heilsa. Við verðum bara áfram í rólegheitunum á internetinu. Það hentar okkur ágætlega. Það er líka svo útbreitt," segir hann grafalvarlegur.

Tíu ár eru liðin síðan Baggalútur steig fram á sjónarviðið. Bragi segir þá félaga aldrei hafa búist við að endast eins lengi og raun ber vitni. „Það var meira spurning hvort við ættum að nenna þessu út mánuðinn á þeim tíma. Það er þrjóskan sem telur í þessum bransa og svo eru líka gríðarlegar tekjur af vefsíðurekstri."

Bragi útilokar ekki að afmælisrit verði gefið út í tilefni áfangans. „Það hefur staðið til í tíu ár en það er aldrei að vita nema við bíðum í níutíu ár í viðbót og gefum þá út fyrstu hundrað árin." -fb