Hundur með skrítin hljóðfæri

„Þetta er alveg frábærlega skemmtileg vinna. Með þeim skemmtilegri sem við höfum komist í,“ segir Hjörleifur Hjartarson úr hljómsveitinni Hundur í óskilum.

Sveitin semur tónlistina í leikritinu Íslandsklukkunni sem verður frumsýnt í Þjóðleikhúsinu í apríl. Nota þeir til þess ýmis skrítin hljóðfæri, þar á meðal Xapoon, sleða-diddjeridoo, symfon, saltara, talibanahorn og krumhorn.

„Við fengum symfonið lánað hjá Ljótu hálfvitunum og talibanahornið er eitthvað sem ég keypti úti í búð í St. Pétursborg. Það hefur ekkert með talibana að gera,“ segir Hjörleifur og bætir við:

„Xapoon er nýtt hljóðfæri sem er í ætt við klarinett. Það er mjög skemmtilegt og maður veit aldrei hvað kemur út úr því.“

Hjörleifur og hinn meðlimur Hunda í óskilum, Eiríkur G. Stephensen, eru báðir búsettir á Norðurlandi og tóku þeir sér frí frá störfum til að vinna við Íslandsklukkuna í höfuðborginni. „Þetta er alveg nýtt fyrir manni að fá að skapa endalaust allan daginn frá níu til fimm,“ segir Hjörleifur.

Hundur í óskilum tekur sér pásu frá Íslandsklukkunni í kvöld. Þá verða þeir með tónleika á Domo klukkan 22 í tilefni fimmtugsafmælis Hjörleifs í næsta mánuði. - fb