Feldberg samdi við breskan útgefanda

Poppdúettinn Feldberg hefur gert samning við breska fyrirtækið Small Town America um útgáfu á plötu sinni Don"t Be a Stranger þar í landi á næsta ári. Sveitin fer einnig í tónleikaferð um landið til að fylgja plötunni eftir.

„Þetta er ekkert stórkostlegur samningur en hann er mjög heiðar­legur og góður. Hann felur í sér útgáfu í Bretlandi upp á eina plötu og þeir lofa ákveðnum peningi í markaðssetningu og fleira. Annars er ekkert upp úr þessu að hafa,“ segir Einar Tönsberg sem skipar sveitina ásamt Rósu Ísfeld.

Samkvæmt samningnum þarf Feldberg að semja sex B-hliða lög fyrir smáskífur sem verða gefnar út til að kynna plötuna.

„Það er dálítið asnalegt að þurfa að gera B-hliða lög því þau þurfa helst ekki að vera nógu góð. Við þurfum að fatta hvernig við eigum að gera þetta. Kannski gerum við þetta bara allt með vinstri,“ segir Einar og hlær.

Það er fleira á döfinni hjá Feldberg því sveitin spilar á þrennum tónleikum í New York í byrjun desember. Fyrstu tónleikarnir verða á vegum norræna menningarsetursins Scandinavia House en hina tvo skipulagði Feldberg sjálf. „Þetta verður mjög skemmtilegt,“ segir Einar og hlakkar til að ferðast með Feldberg í fyrsta sinn til Bandaríkjanna. - fb