Öfgarokk í Reykjavík

Tvær þekktar hljómsveitir úr heimi öfgaþungarokksins eru væntanlegar um helgina 9.-10. apríl til að spila í tíu ára afmælisveislu Andkristnihátíðar. Þetta eru hljómsveitirnar Rotting Christ og Hate.

Gríska hljómsveitin Rotting Christ heimsótti Íslendinga árið 2007 og var þá fyrsta erlenda hljómsveitin úr heimi black metal-tónlistarinnar sem spilaði á Íslandi. Síðan þá hefur hljómsveitin verið á tónleikaferðalagi nær látlaust í tvö ár, en þó gafst bandinu tími til að gera nýja plötu, Aealo. Þetta er tíunda plata bandsins og hefur fengið góða dóma hjá þungarokkspressunni um allan heim.

Hate er pólsk sveit, en eins og þungarokksunnendur vita, og sérlega úr heimi öfgaþungarokks, þá eiga Pólverjar nokkrar af stærstu hljómsveitunum í þessum geira. Ber þar hæst sveitir á borð við Behemoth og Vader. Hate-menn hafa gefið út sex breiðskífur til þessa, sú nýjasta kom árið 2008 og ber titilinn Morphosis.

Tónleikarnir fara fram á Sódómu Reykjavík og þetta verður algjör þungarokksorgía því auk erlendu gestana koma tíu íslenskar þungarokkssveitir fram: Stórböndin Sólstafir og Sororicide, auk Beneath, Atrum, Severed Crotch, Gone Postal, Svartadauða, Chao, Bastard og Gruesome Glory. Þá hafa aðstandendur Andkristnihátíðar opnað heimasíðuna www.andkristni.is, þar sem vefverslun fyrir íslenskar hljómsveitir verður sett upp þegar fram í sækir.

- drg