Greiddu milljónir fyrir plötu

Pönkrokkararnir í Gavin Portland þurftu að greiða milljónir til að leysa út plötu sína IV: Hand in Hand With Traitor – Back to Back With Whores frá útlöndum.

„Við tókum hana upp síðla sumars 2008. Síðan þarf ekki að rekja hvað gerðist það ágæta haust,“ segir bassaleikarinn Arnar Már Ólafsson.

„Við þurftum að borga fúlgur fjár úr eigin vasa til að borga hana út.“ Platan átti að koma út fyrir jólin 2008 en ekkert varð af því vegna efnahagskreppunnar. Gripurinn var þá fastur erlendis þar sem lokafrágangurinn fór fram.

Platan kom loksins út í Þýskalandi 10. febrúar síðastliðinn á vegum þarlendrar útgáfu. Hún er væntanleg til Íslands á næstu dögum eða vikum, og hér heima gefa þeir félagar plötuna út sjálfir. Óvíst er hvort og þá hvenær plötunni verður fylgt eftir með tónleikum. „Það eina sem ég veit er að við erum ánægðir með hana og hlökkum til að fá hana í hendurnar,“ segir Arnar Már.

Platan var tekin upp í Massachusetts af Kurt Ballou, gítarleikara harðkjarnasveitarinnar Converge. Rokk­áhugamenn hafa beðið óþreyjufullir eftir henni, enda þótti fyrsta útgáfa Gavin Portland, III: View of Distant Towns frá árinu 2006, sérlega vel heppnuð. Til að mynda hlaut hún fjögur K af fimm mögulegum í breska tímaritinu Kerrang! - fb