Kjólamálið er ekkert persónulegt

„Ég átti fimmtán prósent í þessu fyrirtæki, var ekki framkvæmdastjóri og það er því fáranlegt af Birtu að rifja þetta upp," segir Linda Björg Árnadóttir, fagstjóri fatahönnunarbrautar LHÍ.

Birta Björnsdóttir, fatahönnuður og eigandi Júníform, sendi fjölmiðlum í gær afrit af bréfi sínu til rektors LHÍ og óskaði eftir formlegri afsökunarbeiðni frá skólanum vegna ummæla Lindu um kjóla hennar í Fréttablaðinu á þriðjudag. Í bréfinu er rifjað upp að Linda hafi átt fatamerkið Crylab og segir Birta svo í bréfinu um það fyrirtæki:

„…voveiflegt gjaldþrot fatamerkis hennar, Crylab, þar sem sviðin jörð og kröfur í tómt þrotabú var það eina sem sat eftir."

Linda hefur verið í París undanfarna daga og því ekki getað fylgst með umræðunni um þetta mál af nægjanlegri athygli. Hún tekur þó fram að þetta sé ekkert persónulegt stríð milli sín og Birtu, hún eigi ekkert sökótt við íslenska hönnuðinn. „Ég er hönnuður sjálf og hef gert ljóta kjóla," segir Linda og vill því beina deilunni í annan og betri farveg, þetta snúist ekki um kjólana tvo, heldur fyrst og fremst um ábyrgð RÚV og skyldur þess gagnvart íslenskri hönnun í allri sinni mynd.

„Þeir hjá Sjónvarpinu eru að búa til eitthvað sem er inni í hverri stofu í landinu. Sjónvarpsfólkið eru ekki stjörnur í einhverju raunveruleikasjónvarpi þótt þær virðist halda það heldur hafa þær ákveðnum skyldum að gegna gagnvart áhorfendum. Þetta á ekki allt að vera svona rosalega sjálfhverft."

Linda bendir jafnframt á þá staðreynd að fyrirtæki óski eftir hennar þjónustu til að láta segja sér hvað sé ljótt og hvað ekki og það sé ástæða fyrir því.

„Slíkt sparar einfaldlega peninga og tíma," segir Linda sem hefur fundið fyrir miklum stuðningi meðal hönnuða og listamanna við hennar hlið.- fgg