Lífið

Austurbæjarbíó lifnar við

Hið fornfræga Austurbæjarbíó verður opnað að nýju í haust. Þóroddur Stefánsson, sem hefur keypt húsið, hyggst koma því í upprunalegt horf en reikna má með fjölbreyttri starfsemi þar.
Hið fornfræga Austurbæjarbíó verður opnað að nýju í haust. Þóroddur Stefánsson, sem hefur keypt húsið, hyggst koma því í upprunalegt horf en reikna má með fjölbreyttri starfsemi þar.

Þóroddur Stefánsson, oftast kenndur við Bónusvídeó-keðjuna, hefur keypt Austurbæjarbíó sem stendur við Snorrabraut. Iðnaðarmenn vinna nú hörðum höndum að því að koma húsinu í gott stand en þetta fornfræga kvikmyndahús og tónleikastaður hefur verið nánast gleymdur og grafinn í miðborg Reykjavíkur. Þóroddur segir það hálfgerðan skandal hversu mikið húsnæðið hefur fengið að grotna niður.

Þóroddur keypti húsnæðið fyrir nokkrum mánuðum en Arionbanki átti það. „Ég ætla að gera það allt upp og koma glæsileika þess í upprunalegt horf. Ég hef alltaf haft gaman af svona fallegum húsum og það er í raun hryllilegt að sjá hvernig komið hefur verið fram við það,“ segir Þóroddur sem ætlar þó ekkert að stressa sig á þessu og tekur fram að hann ætli að gera þetta allt í rólegheitunum. „Þetta verður opnað einhvern tímann í haust, það er svona hugmyndin.“

Þóroddur hefur sett stefnuna á að koma á fót flottu viðburðahúsi þar sem tónlistarmenn og aðrir listamenn geta sýnt sköpun sína. Þá er hugmyndin sú að reisa veitingastað á annarri hæð hússins en þar var áður hinn frægi veitingastaður Silfurtunglið. Þóroddur segir leifarnar af veitingastaðnum vera þar enn þá.

Þóroddur hefur lítið látið fyrir sér fara undanfarin ár. Hann er einn hluthafa í viðburðafyrirtækinu 3sagas sem Árni Þór Vigfússon og Kristján Ra Kristjánsson reka í Svíþjóð. Þóroddur tekur þó fram að þeir tveir komi hvergi nálægt þessu verkefni.

Austurbæjarbíó hefur lengi leikið stórt hlutverk í menningarlífi höfuðborgarinnar frá því að það var vígt árið 1947. Tónlistarfélag Reykjavíkur var þarna fyrst og Sinfóníuhljómsveit Íslands þreytti frumraun sína á sviði Austurbæjarbíós fyrir allmörgum áratugum. Þá hefur fjöldi leikrita verið sett upp í húsnæðinu af bæði sjálfstæðum leikhópum og Leikfélagi Reykjavíkur og ekki má gleyma frægri tónleikaröð Svavars Gests, Ellýjar Vilhjálms og Ragnars Bjarnasonar í Silfurtunglinu. Margir af eldri kynslóðinni muna eflaust eftir kvikmyndasýningum um söngelska kúrekann Roy Rogers sem Friðrik Þór Friðriksson gerði ódauðleg skil í kvikmyndinni Bíódögum.

Á seinni árum rak Samfilm Bíóborgina í húsnæðinu en undanfarin ár hefur starfsemin verið nokkuð skrykkjótt, síðast hýsti Austurbæjarbíó Hús unga fólksins sem Rauði Krossinn, Samfélagið Frumkvæði, Hitt húsið og Félag framhaldsskóla stóðu að. freyrgigja@frettabladid.is




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.