Öruggur sigur Brassa á Fílabeinsströndinni

Brasilíumenn sýndu frábæra takta þegar þeir lögðu Fílabeinsströndina í stórleik dagsins á HM. Luis Fabiano skoraði tvö mörk í 3-1 sigri.

Fabiano var frábær í leiknum. Hann skoraði fyrsta markið með þrusuneglu upp í þaknetið eftir lúmska sendingu frá Kaka.

Fabiano sýndi svo frábæran einleik í seinna markinu sínu þegar hann lék á nokkra varnarmenn og þrumaði boltanum í markið.

Elano skoraði þriðja markið eftir sendingu frá Kaka en Didier Drogba minnkaði muninn með skallamarki.

Niðurstaðan sanngjarn sigur Brassa gegn rögum Fílabeinsstrendingum sem voru hræddir við að sækja.

Kaka fékk sitt annað gula spjald undir lokin þegar hann virtist fara með olnbogann í bringuna á einum andstæðingnum sem hljóp á hann. Fílabeinsstrendingurinn hélt um andlit sitt og fiskaði Kaka af velli.

Brassarnir litu mjög vel út og voru í fantaformi.