Mynduðu brennandi bústað

„Þetta gekk alveg ótrúlega vel, alveg eins og í sögu,“ segir Anna María Karlsdóttir, annar af framleiðendum kvikmyndarinnar Okkar eigin Osló.

Sumarbústaður var „brenndur“ við tökur á myndinni í Miðfellslandi við Þingvallavatn á dögunum. Um eitt hundrað manns voru á svæðinu, þar á meðal lögregla, slökkvilið og eftirlitsaðilar, til að sjá um að allt gengi vel fyrir sig.

„Við byggðum utan um hann og brenndum það. Svo stendur hann eftir óhultur,“ segir Anna um bústaðinn og tekur fram að leikmyndahönnuðurinn Eggert Ketilsson hafi unnið þarna gott starf ásamt brennudeild myndarinnar. „Þetta var einn tökudagur. Það var kveikt margoft í og slökkt aftur.“

Tökur á myndinni halda áfram á Þingvöllum fram eftir mánuðinum. Eftir það verður þráðurinn tekinn upp í Reykjavík og síðan verður farið til Óslóar. Okkar eigin Osló er svo væntanleg í kvikmyndahús í febrúar. . Með helstu hluterk fara Brynhildur Guðjónsdóttir, Þorsteinn Guðmundsson, Hilmir Snær Guðnason og Laddi. Leikstjóri er Reynir Lyngdal. -fb