Skilnaðarstríð Tiger og Elin hafið

Elin Nordergren, fyrrum eiginkona Tiger Woods, hyggst ekki gefa neitt eftir í skilnaði sínum við besta kylfing heims. Lögfræðingastoð mun koma að sambandsslitum parsins.

Elin hefur líkt og skilanefndir íslensku bankanna ráðið sér heilan her fjármálalögfræðinga sem eiga að rannsaka hvort kylfingurinn hafi komið undan eignum. Er Tiger grunaður um að hafa gert það til að minnka það fjárhagslega tap sem hann verður fyrir þegar skilnaðurinn gengur í gegn.

Lögfræðingaskrifstofunni McGuire Woods hefur jafnframt verið falið að rannsaka hvort Tiger eigi einhverjar eignir eða fjármuni sem Elin hafi aldrei vitað af. Samkvæmt sunnudagsútgáfu Mirror starfar tvíburasystir Elin, Josefin, hjá McGuire Woods en fyrirtækið sérhæfir sig í því að hafa uppá földum milljörðum auðjöfra. Lögfræðingarnir bætast við þann hóp sem Elin hefur ráðið sér í Flórída.

Samkvæmt heimildarmanni Mirror hefur það alltaf legið ljóst fyrir hjá Elin að hún ætli sér alls ekki að berjast við Tiger um peninga heldur fari hún fram á sanngjarna upphæð sem talin er nema 240 milljónum punda eða 46 milljörðum íslenskra króna.

„Hún vill einfaldlega vita hversu mikla peninga Tiger á. Upphæðin sem hún krefst er mjög sanngjörn, þetta er þriðjungshlutur af því sem hann hefur þénað á þeim árum sem voru þau gift. Ég held reyndar að Tiger eigi miklar eignir." En eins og frægt er orðið hélt kylfingurinn framhjá konu sinni með fjölda kvenna.

Bandarískir skilnaðar-sérfræðingar spá engu að síður að Elin og Woods verði skilin áður en árið 2010 er á enda. -fgg