Fótbolti

Nýjar reglur UEFA takmarka leikmannakaup og ofurlaun

Hjalti Þór Hreinsson skrifar
500 billjón punda seðill Sheiksh Mansour.
500 billjón punda seðill Sheiksh Mansour. GettyImages
Félögin í ensku úrvalsdeildinni þurfa að lækka laun leikmanna sinna verulega og hætta að eyða umfram eignir eigenda sinna til að standast nýjar reglur sem UEFA mun kynna á morgun. Þær heita „Financial Fair Play" sem gæti útleggst sem sanngirni í fjármálum.

Reglurnar taka gildi tímabilið 2012-2013 og þýða að félögin verða að standast ákveðnar kröfur, meðal annars að þau geta ekki steypt sér í skuldir endalaust og verða að skila hagnaði eða vera á „núllinu".

Fjórtán félög af tuttugu í ensku úrvalsdeildinni töpuðu peningum á tímabilinu 2008-2009 en þrjú ár hefur tekið að hanna reglurnar.

Flest félögin í deildinni eru fjármögnuð frá forríkum eigendum þeirra, lengst ganga Roman Abramovich hjá Chelsea og Sheikh Mansour hjá Manchester City. Þau félög töpuðu 47 milljónum punda og 93 milljónum punda 2009.

Eigendur mega fjárfesta í félögunum en mega ekki taka lán til þess. Eigendur mega þó eyða fjármunum í hluti á borð við æfingavelli og unglingaaðstöður en ekki eyða eins miklu og þeir vilja í leikmannakaup og laun.

Liverpool tapaði til að mynda 55 milljónum punda, mest af því voru 40 milljón punda sem voru vextir af 250 milljón punda láni sem eigendurnir þurftu til að kaupa félagið.

Reglurnar hefðu því komið sér mjög vel fyrir Liverpool á sínum tíma. Ef þær hefðu verið í gildi hefðu þeir George Gillett og Tom Hicks ekki þurft að taka lán til að kaupa félagið, lán sem þeir geta ekki borgað af og þurfa því að selja. Það gengur illa þar sem lánið hefur hækkað og afborganirnar taka peninga sem ellegar hefðu þurft að fara í að styrkja leikmannahópinn eða eitthvað annað tengt félaginu.




Fleiri fréttir

Sjá meira


×