Ferðaþjónustan kallar eftir samkeppnishæfum vöxtum

Samtök ferðaþjónustunnar telja afar brýnt að atvinnulífið fái að búa við vexti sem eru samkeppnishæfir við önnur lönd, öfluga þjónustu fjármálastofnana og afnám gjaldeyrishafta. Ályktun þess efnis var samþykkt á aðalfundi samtakanna í dag.

„Ferðaþjónustan er ein þriggja stærstu stoða í gjaldeyrissköpun þjóðarinnar og náði því marki á síðasta ári að skila 20% af gjaldeyristekjunum. Íslenskt efnahagslíf mun í síauknum mæli treysta á hana í framtíðinni bæði til tekna og atvinnusköpunar um land allt," segir í ályktun aðalfundarins. „Kallað er eftir samvinnu greinarinnar og stjórnvalda um brýnasta verkefni framtíðarinnar sem er vöruþróun fyrir vetrarferðamennsku og markaðssetning hennar. Það mun leiða til betri nýtingar á fjárfestingum yfir vetrartímann."

Að mati Samtaka ferðaþjónustunnar eru bættar samgöngur höfuðforsenda fyrir vöruþróun í ferðamennsku á landsbyggðinni. Samtökin skora á ríkisstjórnina að skera ekki niður fjármagn til samgöngumála.