Evra skrópaði á blaðamannafund franska landsliðsins

Raymond Domenech mætti í dag á blaðamannafund franska landsliðsins en fyrirliði liðsins, Patrice Evra, var fjarverandi.

Mikil dramatík hefur verið í kringum franska landsliðið undanfarna sólarhringa en um helgina var Nicolas Anelka rekinn heim eftir rifrildi við Domenech.

Leikmenn liðsins neituðu að æfa í gær en mættu á æfingu í dag. Domenech útilokaði ekki að einhverjir leikmenn kynnu að neita að spila á morgun, til stuðnings Anelka.

„Það er mögulegt," sagði Domenech þegar hann var spurður út í þetta. Hann studdi þó ákvörðun franska knattspyrnusambandsins um að senda Anelka heim.

„Það getur enginn hagað sér á þennan máta, hvorki í búningsklefanum né annars staðar. Íþróttamenn og -konur verða að vera fyrirmynd fyrir aðra í gegnum knattspyrnuna."