Upson í stað Carragher

Matthew Upson verður í vörn Englands þegar liðið mætir Slóveníu á miðvikudag í stað Jamie Carragher sem mun taka út leikbann í leiknum.

Upson verður því þriðji miðherjinn til að spila við hlið John Terry í ensku vörninni í jafn mörgum leikjum. Ledley King lék fyrri hálfleikinn í leik Englands og Bandaríkjanna en meiddist og var tekinn af velli í hálfleik.

Í hans stað kom Jamie Carragher sem var svo í byrjunarliðinu í leik Englands gegn Alsír á föstudaginn. Carragher fékk gult spjald í báðum leikjum og verður því í banni gegn Slóveníu.

Upson lék reglulega við hlið Terry í undankeppni HM og sagði Fabio Capello landsliðsþjálfari það hafa mikið að segja að hann var valinn en ekki Michael Dawson.

Dawson var kallaður í enska landsliðið á síðustu stundu vegna meiðsla Rio Ferdinand skömmu áður en mótið hófst í Suður-Afríku.